कोभिड–१९ महामारी पछिको पहिलो ‘इस्ट टुरिजम मार्ट’ शुक्रवार सुरु हुँदै

सन २०१८ मा पहिलोपटक आयोजना भएको इस्ट टुरिजम मार्टको दोस्रो संस्करण सन २०१९ मा भएको थियो । सन २०२० को नेपाल भ्रमण वर्ष सफल बनाउन निकै मेहनत गरिएको सन २०१९ को मार्टको प्रभाव देखिनु अगाडिमै कोभिड–१९ महामारी देखिन थाल्यो ।

त्यसपछि भ्रमण वर्ष मात्रै रोकिएन मार्टको नियमित ऋङ्खला पनि रोकियो । त्यसैले सन २०१९ को दोस्रो संस्करण सकिएको तेस्रो वर्षपछि मात्रै तेस्रो संस्करण शुक्रवार हुने भएको छ । 

मार्टमा धरान जेसिसको समेत सहयोग हुने आयोजकको तर्फबाट अध्यक्ष भविषकुमार श्रेष्ठ तथा सचिव एलिना मगरले जारी गरेको प्रेस रिलिजमा भनिएको छ । जेसिसले स्थानीय मौलिक देखी अन्तर्राष्ट्रिय खानाहरूको परिकार पस्कने खाद्य उत्सव आयोजना गर्नेछ । 

तीन दिनसम्म चल्ने मार्टमा एक सय वटा देशीविदेशी पर्यटन स्टलहरू हुनेछन् भने नेपाल तथा भारतबाट आएका दुई सय पाहुना धरान ओर्लने आयोजकको भनाई छ । मार्टका अवलोकनकर्ताहरू भने हजारौँ हुने आयोजकको अपेक्षा छ ।